डहाणू (पालघर) : पालघर जिल्हा परिषद आणि मुंबईतील रोशनी फाउंडेशन यांच्या वतीने डहाणू येथील बाहारे आणि जामशेत सावरपाडा शाळेतील सहावी, सातवी आणि आठव्या इयत्तेतील विद्यार्थ्यांकरिता छत्रपती शिवाजी टर्मिनस येथे १९ जुलै रोजी येणाऱ्या ‘सायन्स एक्स्प्रेस’ला भेट देण्याची संधी उपलब्ध करून देण्यात आली आहे.
पन्नास विद्यार्थी व पाच शिक्षक यांना ही शैक्षणिक सहल नि:शुल्क आहे. जास्तीत जास्त विद्यार्थ्यांनी या संधीचा लाभ घ्यावा, असे आवाहन पालघर जिल्हा परिषदेमार्फत करण्यात आले आहे.
मुलांमध्ये विज्ञानाची आवड निर्माण करण्यास मदत करण्याच्या उद्देशाने विज्ञान आणि तंत्रज्ञान विभाग, पर्यावरण वन आणि पर्यावरणबदल मंत्रालय आणि रेल्वे मंत्रालय यांच्यामार्फत विज्ञान विशेष रेल्वे गाडी भारतभर भ्रमण करत आहे. ही रेल्वेगाडी १९ ते २२ जुलै दरम्यान छत्रपती शिवाजी टर्मिनस येथे थांबणार आहे. ही विज्ञान एक्स्प्रेस देशभरातील विद्यार्थ्यांचे विशेष आकर्षण ठरत आहे.